LinksSonntag, September 13, 2020, 12:06 - GELESENES
Entschlöinige. Abefahre. Düreschnuufe. Nümm gäng hie u dert u überall sy. Deheim blybe. Sech aber nid yigle. Trotzdäm i Bewegig blybe. Alls chly angers gwichte. Verzichte. Häng wäsche statt Häng schüttle. Wider Häng wäsche. U no einisch Häng wäsche. Teschte, teschte, teschte. O mit Widersprüch läbe. U äbe: Nume no LANGSAM pressiere. Nachedänke statt Dryschiesse. Überdänke, Umdänke. Sech nid über alls, wo eim yschränkt, ufrege. Überlege. Ufruume - um sich ume u i sich inne. Dürelüfte. Alls chli relativiere. Sech nöi orientiere. U gäng wider d Häng desinfiziere. Über Gott u d Wält philosophiere. Über ds Läbe. U über d Gränze vom Leischtigs- u Gwinnsträbe.Halt nümm wi gwohnt schalte u walte. Abstand halte. Mass halte. E Gang abeschalte. Zrüggbuechstabiere. Bescheidener wärde. Meh gäh statt näh. Nümm gäng no meh. Alls chli angers gseh. Se akzeptiere, behördlechi Gebott u Verbott. Bätte, wär wott - glych zu welem Gott. Schetze, was me hett. Uf mängs halt verzichte, wo me wett. Statt umetschette whatsäpple. Änglisch lehre ir Quarantäne: Lockdown, Lockout, Home-office, Home-schooling, Contact-Tracing, Social Distancing. Sech halt i Gedanke necher cho. Sech bewusst sy, wi privilegiert mir sy. Mit dene, wo nid privilegiert sy, solidarisch sy. Dankbar sy.
Dene vertroue, wo meh wüsse, statt dene, wo alls besser wüsse - obs um Risikogruppe geit oder um Nöiasteckige, um Stärblechkeit oder Überstärblechkeit, um Hygienemassnahme oder Lungemaschine, um Masketragpflicht oder Milliardekredit, um Schutzkonzept oder Exit-Strategie, um Krisekommunikation oder um ärztlechi u pflegerischi Spitzeleischtige uf der Intensivstation.
Zwüschine aber o angers dänke als gäng a das Virus mit däm so gschpänschtisch-schöne Name Corona. Zueversicht ha. Fröid ha am Läbe. U äbe: Entschlöinige. Nume no LANGSAM pressiere. Geduld ha. S chönnt ja no es Zytli gah.
Walter Däpp - Link: www.walterdaepp.ch
Quelle: Egelsee-Zeitung Nr. 3/2020, Seite 7, "Corona-Collage" - Link: www.soml.ch